Ágrip

Markmið rannsóknarinnar var að skoða hver notkun íslenskra skipulagsheilda væri af stjórnkerfisstöðlunum ÍST EN ISO 9001, ÍST EN ISO 14001 og ÍST EN ISO/IEC 27001. Enn fremur að kanna hvaða ávinning þær teldu sig hafa haft af vottun samkvæmt þeim. Megindleg aðferðafræði, spurningalistakönnun sem mælitæki, var notuð við framkvæmd rannsóknarinnar.

Rannsóknarspurningarnar snérust um: (1) Innleiðingu og notkun staðlanna. (2) Hversu lengi vottunin hefði varað. (3) Hver ávinningurinn af vottuninni hefði verið. Nokkrar helstu niðurstöðurnar sýna að ávinningur jókst eftir því sem skipulagsheildir höfðu verið með vottun í lengri tíma. Þátttakendur með ISO 9001-vottun voru tæplega 95% mjög eða frekar sammála því að ávinningurinn af vottun væri bætt aðgengi að skjölum, liðlega 90% að hún hefði breytt vinnulagi til batnaðar, rúmlega 85% að hún hefði leitt til betri ímyndar og liðlega 75% að hún hefði aukið samkeppnishæfni.

Þátttakendur með 14001-vottun voru rúmlega 95% mjög eða frekar sammála því að ávinningurinn hefði leitt til betri ímyndar og breytt vinnulagi til batnaðar, 75% að vottunin hefði samræmt þjónustu og tæplega 75% að hún hefði aukið samkeppnishæfni. Þátttakendur með ISO 27001-vottun voru 100% mjög eða frekar sammála því að vottunin hefði leitt til betri ímyndar og breytt vinnulagi til batnaðar, liðlega 90% að hún hefði bætt aðgengi skjölum og 90% að hún hefði lágmarkað ósamræmi/frávik.